കേരളാ പ്രവാസി അസോസിയേഷൻ..

ലോകരാജ്യങ്ങളിലെ പ്രവാസികളുടെ എണ്ണത്തിൽ ഇന്ത്യയാണ് മുന്നിലെന്ന റിപ്പോർട്ട് വന്നത് അടുത്തിടെയാണ്. രാജ്യത്തേക്ക് ഗണ്യമായ അളവിൽ വിദേശത്ത് നിന്നും പണമൊഴുകുന്നതിന്റെ പ്രധാന കാരണം പ്രവാസി ഇന്ത്യക്കാരാണ്. രാജ്യം സാമ്പത്തിക മാന്ദ്യത്തിലൂടെ കടന്നു പോവുന്ന ഈ കാലത്ത് ഇന്ത്യയുടെ ജിഡിപിയിൽ പ്രവാസികൾ നൽകിയ സംഭാവന വളരെ പ്രധാനമാണ്. ഗൾഫ് കുടിയേറ്റം അര നൂറ്റാണ്ട് പിന്നിടുമ്പോൾ കേരളത്തിന്റെയും ലോകത്തിന്റെയും ഭൂപടങ്ങളിൽ ഗണ്യമായ മാറ്റങ്ങൾ ദൃശ്യമാണ്. വന്‍കിട വ്യവസായങ്ങളോ, വലിയ സാമ്പത്തിക വരുമാന മാര്‍ഗ്ഗങ്ങളൊ ഇല്ലാത്ത കേരളം പതിറ്റാണ്ടുകളായി ഇന്ത്യയിൽ നിന്ന് ഇതര രാജ്യങ്ങളിലേക്ക് മനുഷ്യവിഭവശേഷി കയറ്റി അയയ്ക്കുന്ന കേന്ദ്രങ്ങളിലൊന്നാണ്. കേരളീയ സമ്പദ്ഘടനയുടെ നട്ടെല്ല് എന്ന് ആലങ്കാരികമായി വിശേഷിപ്പിക്കപ്പെട്ടുപോരുന്ന ഗൾഫ് പണത്തിന്റെ ഒഴുക്കിൽ സംസ്ഥാനം സാമ്പത്തികമായി അഭിവൃദ്ധി പ്രാപിച്ചതോടൊപ്പം സാമൂഹിക സാംസ്കാരിക പരിസരങ്ങളിൽ അത് സൃഷ്ടിച്ച മഹാ വിപ്ലവവും കാണേണ്ടതുണ്ട്. 

സ്വന്തം നാട്ടിൽ അഭിമാനത്തോടെ തൊഴിൽ ചെയ്ത് ജീവിക്കുന്നതിനുള്ള സാഹചര്യം എല്ലാ മനുഷ്യരും ആഗ്രഹിക്കുന്നതാണ്. എന്നാൽ ഇവിടുത്തെ സാമൂഹിക സാഹചര്യങ്ങളാണ്  നമ്മുടെ നാടിന്റെ ചരിത്രത്തിൽ ഒരു പ്രവാസി സമൂഹത്തെ സൃഷ്ടിച്ചതും, സൃഷ്ടിച്ചുകൊണ്ടിരിക്കുന്നതും. എണ്ണത്തിൽ കുറവാണെങ്കിലും പ്രവാസം ഒരു അനിവാര്യതയായിത്തന്നെ  നിലനിൽക്കുന്നു.. ജീവിതരീതിയിൽ, സദാചാരസങ്കല്പത്തിൽ, വസ്ത്രധാരണത്തിൽ, ഭക്ഷണകാര്യത്തിൽ, ബന്ധങ്ങളിൽ എല്ലാം പ്രവാസ ജീവിതത്തിന്റെ സ്വാംശീകരണങ്ങൾ നമ്മുടെ സമൂഹത്തിൽ പ്രകടമായിരിക്കുന്നുമുണ്ട്. 

മലയാളിയുടെ ജീവിത ശൈലിയിൽ ദിശാമാറ്റം കുറിച്ചവരാണ് പ്രവാസികൾ.  പ്രവാസം നമ്മുടെ ചരിത്രത്തിന്റെ ഭാഗമാണ്; അനിവാര്യതയുമാണ്. അതുകൊണ്ട് തന്നെ പ്രവാസി സമൂഹത്തെ ഉൾച്ചേർത്ത് കൊണ്ടുമാത്രമേ ഇനിയുള്ള വികസന പദ്ധതികൾ നമുക്ക് സൃഷ്ടിക്കുവാൻ കഴിയൂ. രാജ്യത്തിന്റെ സാമ്പത്തിക, സാമൂഹിക സാഹചര്യങ്ങൾ രൂപപ്പെടുത്തുന്നതിൽ പ്രവാസികൾക്ക് കാര്യമായ പങ്കു വഹിക്കാനാകും. പ്രവാസികൾ ആർജിച്ചെടുത്ത അറിവും, കഴിവും, ആശയങ്ങളും, നൈപുണ്യവും, സാങ്കേതികജ്ഞാനവും, ഇന്ത്യയെകുറിച്ചുള്ള കാഴ്ചപ്പാടും വിലമതിക്കാൻ കഴിയാത്തവയാണ്. ഈ കഴിവുകൾ ഉപയോഗപ്പെടുത്താൻ പ്രവാസി സമൂഹത്തിനു ഒരു വേദിയുണ്ടായെ തീരു. പ്രവാസികളുടെ തൊഴിൽ സംരംഭങ്ങൾ നടത്തിയുള്ള പരിചയവും, ഗണ്യമായ വൈദഗ്ധ്യവും ഏതൊരു വെല്ലുവിളികളെയും അതിജീവിക്കാനുള്ള കരുത്തും, ആർജവവും ഉപയോഗപ്പെടുത്തി പ്രവാസികളുടെ കാഴ്ചപ്പാടിലുള്ള സ്വയം പര്യാപ്തമായ ഒരു നവ ഇന്ത്യ ജനപങ്കാളിത്തത്തോടെ കെട്ടിപ്പടുക്കുക എന്നുള്ളതാണ് കേരളാ പ്രവാസി അസോസിയേഷൻ ലക്ഷ്യം വക്കുന്നത്.

ദാരിദ്ര്യം ഒരു സാമ്പത്തിക പ്രശ്‌നമല്ല, മറിച്ച് വരുമാനത്തിന്റെയും അന്തസ്സോടെ ജീവിക്കാനുള്ള അടിസ്ഥാന സൗകര്യങ്ങളുടെയും അഭാവമാണ്. ഈ സാഹചര്യത്തിൽ ദാരിദ്ര്യ നിർമ്മാർജ്ജനം എന്ന  ലക്ഷ്യത്തിൽ KPA തീവ്രമായി പ്രതിജ്ഞാബദ്ധരാണ്.